ఏలూరు జిల్లా, ఏలూరు: తెలుగు వారి ఆత్మగౌరవానికి చిరస్థాయిగా నిలిచిన మహానాయకుడు, తెలుగుదేశం పార్టీ వ్యవస్థాపకులు, ఉమ్మడి ఆంధ్రప్రదేశ్ మాజీ ముఖ్యమంత్రివర్యులు శ్రీ నందమూరి తారకరామారావు గారి వర్ధంతి సందర్భంగా ఉమ్మడి పశ్చిమ గోదావరి జిల్లా పరిషత్ చైర్పర్సన్ శ్రీమతి ఘంటా పద్మశ్రీ ప్రసాద్ జిల్లా పరిషత్ కార్యాలయంలో ఘనంగా నివాళులు అర్పించారు.
ఈ సందర్భంగా జిల్లా పరిషత్ కార్యాలయంలో ఏర్పాటు చేసిన ఎన్టీఆర్ గారి విగ్రహానికి పూలమాలలు వేసి ఘన నివాళులు అర్పించారు. అనంతరం ఎన్టీఆర్ గారి జీవితం, రాజకీయ ప్రస్థానం, ప్రజల కోసం ఆయన చేసిన అపూర్వ సేవలను స్మరించుకుంటూ మాట్లాడారు.
ఎన్టీఆర్ తెలుగు వారి ఆత్మగౌరవాన్ని ప్రపంచానికి చాటిన మహానాయకుడని, సినిమాల ద్వారా తెలుగు సంస్కృతి, సంప్రదాయాలకు విశ్వవ్యాప్త గుర్తింపును తీసుకువచ్చారని చైర్పర్సన్ తెలిపారు. రాజకీయాల్లోకి వచ్చి అతి తక్కువ కాలంలోనే ప్రజల విశ్వాసాన్ని సంపాదించి, పేదల సంక్షేమమే లక్ష్యంగా పాలన సాగించిన నాయకుడిగా చరిత్రలో నిలిచారని పేర్కొన్నారు.
రూ. 2 కిలోల బియ్యం పథకం, గ్రామ స్వరాజ్యానికి బాటలు వేయడం, స్థానిక సంస్థలకు బలాన్ని చేకూర్చడం వంటి అనేక సంస్కరణల ద్వారా సామాన్య ప్రజల జీవితాల్లో ఎన్టీఆర్ విప్లవాత్మక మార్పులు తీసుకువచ్చారని ఆమె గుర్తు చేశారు.
అనంతరం జిల్లా పరిషత్ కార్యాలయంలో విధులు నిర్వహిస్తున్న పారిశుద్ధ్య కార్మికులకు నూతన వస్త్రాలను అందజేసి, వారి సేవలను అభినందించారు. సమాజ ఆరోగ్య పరిరక్షణలో పారిశుద్ధ్య కార్మికుల పాత్ర అత్యంత కీలకమని, వారి సేవలు అమూల్యమైనవని పేర్కొంటూ, కార్మికుల సంక్షేమానికి జిల్లా పరిషత్ ఎల్లప్పుడూ కట్టుబడి ఉంటుందని భరోసా ఇచ్చారు.
ఈ కార్యక్రమంలో జిల్లా పరిషత్ సభ్యులు, అధికారులు, ఉద్యోగులు, ప్రజాప్రతినిధులు, పార్టీ నాయకులు పాల్గొని ఎన్టీఆర్ గారికి ఘన నివాళులు అర్పించారు. ఎన్టీఆర్ ఆశయాలు, సిద్ధాంతాలు నేటి తరానికి స్ఫూర్తిదాయకమని, ప్రజాసేవే లక్ష్యంగా ఆయన చూపిన మార్గంలో నడవడమే ఆయనకు ఇచ్చే నిజమైన నివాళి అని చైర్పర్సన్ ఘంటా పద్మశ్రీ ప్రసాద్ పేర్కొన్నారు.
%20(1)_11zon.png)
Social Plugin