శెట్టి వారి గూడెంలో పేదలకు స్మశాన వాటిక ఏర్పాటు చేయాలి

ఎమ్మార్వోకు వినతిపత్రం అందజేసిన గ్రామ ప్రజలు

చింతలపూడి (పశ్చిమ వాహిని ప్రతినిధి): ఏలూరు జిల్లా చింతలపూడి మండలం శెట్టి వారి గూడెం గ్రామపంచాయతీలో పేద ప్రజలకు స్మశాన వాటిక ఏర్పాటు చేయాలని కోరుతూ గ్రామ ప్రజలు ఎమ్మార్వోకు వినతిపత్రం అందజేశారు.

ఈ సందర్భంగా గ్రామ మాజీ సర్పంచ్ఆది సత్యనారాయణ మాట్లాడుతూ, గ్రామంలో అనాదిగా వివిధ వర్గాలకు స్మశానాల కోసం భూమి కేటాయింపులు ఉన్నాయని తెలిపారు. ఎస్సీలకు ఒక ఎకరం, ఓసీలకు ఒక ఎకరం, బీసీలకు ఒక ఎకరం భూమి కేటాయించినప్పటికీ ఇప్పటివరకు ఆ భూమిని విభజించి అందించడంలో జాప్యం జరుగుతోందని ఆవేదన వ్యక్తం చేశారు.

ఈ సమస్యను ఎమ్మెల్యే గారి దృష్టికి తీసుకెళ్లగా, ఆయన వెంటనే ఎమ్మార్వోకు లేఖ రాశారని తెలిపారు. అయినప్పటికీ ఎమ్మార్వో, విఆర్ఓల స్థాయిలో మూడు నెలలుగా కాలయాపన జరుగుతుండటం ఆశ్చర్యంగా ఉందన్నారు.

గత ప్రభుత్వ కాలంలో ఉత్తమ ఎమ్మార్వోగా అవార్డు పొందిన అధికారి కావడంతో, ఆమె స్వయంగా చొరవ తీసుకొని భూమి విభజన పూర్తి చేసి **ఎస్సీ, ఎస్టీ, బీసీ పేద ప్రజలకు న్యాయం చేయాలని** మాజీ సర్పంచ్ ఆది సత్యనారాయణ ఎమ్మార్వోను కోరారు. గ్రామంలోని పేద ప్రజల గౌరవానికి సంబంధించిన ఈ అంశంపై అధికారులు వెంటనే స్పందించాలని గ్రామ ప్రజలు విజ్ఞప్తి చేశారు.