జనసాంప్రదాయాలకు పెద్దపీట: కోడి పందాలను ప్రారంభించిన పోలవరం ఎమ్మెల్యే చిర్రి బాలరాజు

ఏలూరు జిల్లా జీలుగుమిల్లి: మండలంలో సంక్రాంతి పండుగను పురస్కరించుకొని నిర్వహిస్తున్న సాంప్రదాయ కోడి పందాలను పోలవరం శాసనసభ్యులు చిర్రి బాలరాజు గారు ఘనంగా ప్రారంభించారు. గ్రామీణ సంస్కృతి, సంప్రదాయాలకు ప్రతీకగా నిలిచే ఈ కార్యక్రమం పండుగ వాతావరణాన్ని మరింత ఉత్సాహంగా మార్చింది.

ఈ సందర్భంగా ఎమ్మెల్యే చిర్రి బాలరాజు రిబ్బన్ కట్ చేసి కోడి పందాలకు శుభారంభం పలికారు. అనంతరం నిర్వాహకులు, గ్రామస్థులతో కలసి కార్యక్రమ ఏర్పాట్లను పరిశీలించారు.

ఈ సందర్భంగా ఎమ్మెల్యే చిర్రి బాలరాజు మాట్లాడుతూ, సంక్రాంతి పండుగ మన సంస్కృతి, సంప్రదాయాలకు ప్రతీక అని అన్నారు. గ్రామీణ జీవనశైలిని ప్రతిబింబించే కోడి పందాలు వంటి సంప్రదాయ కార్యక్రమాలు కొనసాగడం ఆనందకరమని పేర్కొన్నారు. ఇలాంటి వేడుకల ద్వారా గ్రామాల మధ్య స్నేహబంధాలు మరింత బలపడతాయని, యువత తమ సంస్కృతిని మరచిపోకుండా ముందుకు సాగాలని సూచించారు.

ఈ కార్యక్రమంలో జనసేన జిల్లా కార్యదర్శి గడ్డమనగు రవికుమార్, జీలుగుమిల్లి మండల అధ్యక్షుడు పసుపులేటి రాము, కూటమి నాయకులు చిర్రి శ్రీనివాస్, పద్దం వెంకటకృష్ణ, కోలా మధు, పెరబత్తుల డేవిడ్ రాజు తదితరులు పాల్గొని ఎమ్మెల్యే కి శుభాకాంక్షలు తెలియజేశారు. సాంప్రదాయ పండుగ వేడుకలతో జీలుగుమిల్లి మండలమంతా సంక్రాంతి సందడితో కళకళలాడింది.