శ్రీ మాధురి జూనియర్ కళాశాలలో విద్యార్థులకు రోడ్డు భద్రతపై అవగాహన

January 09, 2026

ఏలూరు జిల్లా, భీమడోలు: మండలంలోని శ్రీ మాధురి జూనియర్ కళాశాలలో విద్యార్థులకు రోడ్డు భద్రతపై అవగాహన కల్పించేందుకు ప్రత్యేకంగా రోడ్డు భద్రత అవగాహన కార్యక్రమం మరియు అవగాహన సదస్సును నిర్వహించారు. ఈ కార్యక్రమం ద్వారా విద్యార్థుల్లో రోడ్డు భద్రతా ప్రమాణాలపై స్పష్టమైన అవగాహన పెంపొందించడం లక్ష్యంగా పెట్టుకున్నారు.

ఈ కార్యక్రమానికి కళాశాల కరస్పాండెంట్ కె ప్రేమ్ కుమార్ అధ్యక్షత వహించారు... ఈ సందర్భంగా ముఖ్య అతిథులుగా రమేష్ బాబు(మోటార్ వెహికిల్ ఇన్‌స్పెక్టర్ (MVI)), జగదీష్(అసిస్టెంట్ మోటార్ వెహికిల్ ఇన్‌స్పెక్టర్ (AMVI)), వై. కల్యాణి(AMVI), కమల ప్రజ్ఞ(AMVI) హాజరైనారు.

విద్యార్థులను ఉద్దేశించి మాట్లాడుతూ.. రోడ్డు ప్రమాదాల నివారణలో ప్రతి ఒక్కరి బాధ్యత ఎంతో ముఖ్యమని తెలిపారు. ముఖ్యంగా ద్విచక్ర వాహనాలు నడిపేటప్పుడు హెల్మెట్ తప్పనిసరిగా ధరించడం, నాలుగు చక్రాల వాహనాల్లో సీట్ బెల్ట్ వినియోగం, ట్రాఫిక్ నియమాలను కచ్చితంగా పాటించడం, మద్యం సేవించి వాహనం నడపకూడదని వివరించారు.

అలాగే వాహనం నడిపేటప్పుడు మొబైల్ ఫోన్ వినియోగం వల్ల కలిగే ప్రమాదాలు, వేగ పరిమితుల ప్రాముఖ్యత, పాదచారుల భద్రత వంటి అంశాలపై విద్యార్థులకు స్పష్టంగా అవగాహన కల్పించారు. చిన్న వయస్సు నుంచే రోడ్డు భద్రతా నియమాలను అలవాటు చేసుకుంటే సమాజంలో ప్రమాదాలను గణనీయంగా తగ్గించవచ్చని వారు పేర్కొన్నారు.

ఈ కార్యక్రమంలో కళాశాల ఇంచార్జి పి బాలు, అధ్యాపక బృందం, సిబ్బంది మరియు విద్యార్థులు పెద్ద సంఖ్యలో పాల్గొని కార్యక్రమాన్ని విజయవంతం చేశారు. విద్యార్థులు సందేహాలు అడిగి, అధికారుల సూచనలను ఆసక్తిగా విన్నారు. కళాశాల యాజమాన్యం ఈ కార్యక్రమాన్ని నిర్వహించిన రవాణా శాఖ అధికారులకు కృతజ్ఞతలు తెలియజేసింది.