ఏలూరు, డిసెంబర్ 9: రాబోయే ఏలూరు అమ్మవార్ల జాతర ఉత్సవాల ఏర్పాట్లపై ఉన్నతాధికారులు మంగళవారం సమీక్షా సమావేశం నిర్వహించారు. ఏలూరు ఆర్డీవో, టౌన్ డీఎస్పీ, వన్ టౌన్ సీఐ, ఎమ్మార్వోలతో పాటు తూర్పు, పడమర, దక్షిణ వీధి జాతర కమిటీల పెద్దలు ఈ సమావేశానికి హాజరయ్యారు. జాతరలను శాంతియుతంగా, సురక్షితంగా నిర్వహించేందుకు అధికారులు కమిటీలకు పలు సూచనలు, మార్గదర్శకాలను అందించారు.
సమావేశంలో భాగంగా మూడు జాతరల పరిధులను స్పష్టంగా గుర్తించి, కమిటీలతో విడివిడిగా చర్చించి బౌండరీలను నిర్ధారించారు. దీనివల్ల భవిష్యత్తులో అపార్థాలు, సంఘర్షణలు తలెత్తకుండా జాతర నిర్వహణ సజావుగా కొనసాగుతుందని అధికారులు అభిప్రాయపడ్డారు. అలాగే ఊరేగింపుల సమయంలో ట్రాఫిక్కు అంతరాయం లేకుండా ప్రతీ వీధికి ప్రత్యేక రూట్ మ్యాప్ను రూపొందించుకోవాలని కమిటీలను ఆదేశించారు.
జాతర ప్రాంతాల్లో భద్రతా పర్యవేక్షణను పెంచేందుకు సీసీ కెమెరాల ఏర్పాటు తప్పనిసరి చేయాలని అధికారులు స్పష్టం చేశారు. జాతర సమయంలో అశ్లీల నృత్యాలు, అక్రమ మద్యం సేవించడం, పేకాట వంటి అసాంఘిక కార్యకలాపాలకు అవకాశం ఇవ్వకూడదని, ఎవరైనా చట్టాన్ని అతిక్రమించినట్లయితే కఠిన చర్యలు తప్పవని హెచ్చరించారు.
శాంతి భద్రతల పరిరక్షణకు కమిటీ సభ్యులు పోలీసు శాఖతో పూర్తి సమన్వయం పాటించాలని సూచిస్తూ, జాతర ఉత్సవాలను భక్తి భావంతో, ప్రజలకు ఇబ్బంది కలగకుండా విజయవంతంగా నిర్వహించాల్సిన అవసరాన్ని అధికారులు ఈ సమావేశంలో స్పష్టం చేశారు.
%20(1)_11zon.png)
Social Plugin