కులాలకతీతంగా మహనీయులను గౌరవించాలి – అమరజీవి జలధార శంకుస్థాపనలో డిప్యూటీ సీఎం పవన్ కళ్యాణ్

ఏలూరు జిల్లా: ఉభయ గోదావరి జిల్లాల ప్రజలకు సురక్షిత తాగునీరు అందించడమే లక్ష్యంగా రూ.3,050 కోట్ల వ్యయంతో చేపట్టిన ‘అమరజీవి జలధార’ వాటర్ గ్రిడ్ ప్రాజెక్టు పనులకు ఉప ముఖ్యమంత్రి పవన్ కళ్యాణ్ శంకుస్థాపన చేశారు. ఈ సందర్భంగా ఆయన మాట్లాడుతూ, మహనీయులు, గొప్ప నాయకులను కులాలకు పరిమితం చేయడం వల్ల మనం భారతీయులుగా ఎదగలేమని, కేవలం కులాల సమూహంగానే మిగిలిపోతామని వ్యాఖ్యానించారు.

అంబేద్కర్, మహాత్మా గాంధీ, అమరజీవి పొట్టి శ్రీరాములు వంటి మహనీయులు సమాజమంతటికీ ఆలోచించిన గొప్ప వ్యక్తులని, వారిని కులాలకతీతంగా చూడాల్సిన అవసరం ఉందని పవన్ కళ్యాణ్ స్పష్టం చేశారు. ఒక సందర్భంలో పొట్టి శ్రీరాములు జయంతి నాడు ఆయన విగ్రహానికి నివాళులు అర్పించేందుకు వెళ్తే, అది ఒక కుల సత్రం వద్ద ఉందని తెలిసి తీవ్రంగా ఆవేదన చెందానని గుర్తు చేసుకున్నారు. తెలుగువారంతా కోసం ప్రాణత్యాగం చేసిన వ్యక్తిని ఒక కులానికి లేదా ఒక జిల్లాకు పరిమితం చేయడం సరికాదన్నారు.

రాష్ట్రవ్యాప్తంగా ఐదు జిల్లాల్లో అమరజీవి జలధార వాటర్ గ్రిడ్ ప్రాజెక్టుల కోసం ప్రభుత్వం మొత్తం రూ.7,910 కోట్లు వెచ్చిస్తున్నట్లు డిప్యూటీ సీఎం తెలిపారు. ఈ ప్రాజెక్టుకు ‘అమరజీవి’ అనే పేరు పెట్టడానికి బలమైన కారణం ఉందని వివరించారు. తెలుగువారి ఐక్యత కోసం ముఖ్యమంత్రి పదవిని త్యాగం చేసిన బూర్గుల రామకృష్ణారావు, తెలుగువారి ఆత్మగౌరవం కోసం ప్రాణాలు అర్పించిన అమరజీవి పొట్టి శ్రీరాములు తనకు ఎంతో ప్రేరణనిచ్చిన నాయకులని అన్నారు.

వారి త్యాగాలను స్మరించుకుంటూనే ఈ పథకానికి ‘అమరజీవి జలధార’ అనే పేరు పెట్టామని, ఈ ప్రాజెక్టు ద్వారా కోట్లాది మందికి శాశ్వత తాగునీటి భద్రత కల్పించడమే ప్రభుత్వ లక్ష్యమని పవన్ కళ్యాణ్ తెలిపారు. ప్రజల సంక్షేమం, రాష్ట్ర సమగ్ర అభివృద్ధే కూటమి ప్రభుత్వ ప్రధాన ధ్యేయమని ఆయన పేర్కొన్నారు.